Zindagi Ka Naya Nazariya

 Zindagi Ka Naya Nazariya: Apne Upar Dhyan Dene Ka Waqt

"Aaj ka din kuch alag hai. Na koi kaam, na koi responsibilities... bas masti, relaxation, aur thoda waqt apne upar. Health ke liye time nikalna zaroori hai, aur aaj maine wohi kiya. Lekin mann ke ek kone mein ab bhi ek awaaz hai: “Kaam karo, Sunday hone ke bawajood".

"Ye soch mujhe is sachai ka ehsaas karati hai ki jab hum apne upar focus karte hain, toh na waqt ka pata chalta hai aur na kisi aur cheez ka. Pure mann se kaam karna, apni zindagi ka har moment meaningful banana – isi mein asli satisfaction hai".

11 Mahine Ki Utal-Putal Aur Seekhne Ka Safar

Zindagi hamesha ek smooth road nahi hoti. Pichhle 11 mahine meri life ke sabse challenging rahe. Usse pehle sab kuch best tha, lekin un mushkil dinon ne mujhe zindagi ka asli maqsad samajhne ka ek chance diya.

Mushkilein kabhi-kabhi ek pause button ki tarah kaam karti hain – zindagi ke is daud bhare safar mein ruk kar sochne ka mauka deti hain: "Main kya kar raha hoon? Kis taraf ja raha hoon?" Ye sawal chhote Zarur hai, lekin jawab poori zindagi badal dete hain.. Maine yahi kiya. Apni zindagi ko nayi disha dene ka faisla kiya.

Apne Liye Kuch Karne Ki Soch

Jab maine socha ki apne liye kuch naya kiya jai, ek aisi cheez jisme bas main aur meri dedication ho, toh mujhe laga ki duniya meri ho sakti hai. Maine 15 din pehle YouTube join kiya, aur tab se meri zindagi ka ek naya chapter shuru ho gaya.

Ab toh aisa lagta hai jaise aas-paas ke logon aur samay ka bhi ehsaas nahi hota. Subah kab hoti hai aur raat kab dhalti hai, pata hi nahi chalta. Har din naye ideas, naye goals, aur naye challenges ke saath shuru hota hai.

Life Ka Sabse Bada Lesson

Aaj main sirf ek cheez samajh gaya hoon: Zindagi mein self-focus sabse zaroori hai. Jab aap apne liye kaam karte hain, apne passion ko follow karte hain, toh har din ek naye excitement ke saath shuru hota hai. Mushkilein aayengi, lekin woh aapko aur majboot banayengi.

Maine seekha ki kaam worship hai, lekin self-care ek necessity hai. Aur jab dono ka balance mil jata hai, tabhi asli growth hoti hai. Ab main sirf ek hi goal ke saath chal raha hoon: Apne sapno ko poora karna aur ek aise insaan banna jo apni zindagi se khush ho.

Agar aap bhi zindagi ke kisi phase mein uljhan me hain, toh ek moment ke liye rukkar sochiye – main kya kar raha hoon, aur mujhe kya karna chahiye? Yeh jawab hi aapki life ko nayi disha denge. Bas khud par bharosa rakhiye aur apne goals ke liye lagan ke saath kaam kijiye.

Give your feedback by email or comment. 

Thanking You 

By IHK  @indianihk   @indianihkofficial   

email: reaction.photon@gmail.com

22 Dec, 2024 (Sunday)

Next Update soon...